A tripulación infantil masculina do C.R. Mecos iza a bandeira de campioa de España de bateis
AROUSA
O remo do sur de Arousa contou con outros dous barcos nas finais polos títulos
29 abr 2024 . Actualizado a las 20:59 h.O Club de Remo Mecos volveu demostrar na mañá do domingo a calidade do traballo que está a facer coa súa canteira. Un labor coroado co título de campións de España de bateis dos integrantes da súa tripulación infantil, que na Pobra do Caramiñal gañaron o dereito de ondear a bandeira que acredita a mellor embarcación da temporada a nivel estatal.
Só unha semana despois de coroarse campións galegos no mesmo escenario, Marcos Cores Soto, Roi Rey Conde, José Carlos Caneda Gómez, Breogán Villanueva Conde e Uxía Estévez Rey, esta última, en calidade de patroa, marcaron o mellor crono na súa segunda final da temporada na Pobra do Caramiñal. Os seus 4.39,01 foron case catro segundos menos cós que lle deron ao Club de Remo La Planchada (Astillero, Cantabria) a prata nacional.
O remo do sur de Arousa contou con outros dous barcos nas finais polos títulos do Campionato de España de Bateis, ambos os dous, nas categorías absolutas. E tanto un como o outro, pechando cadansúa regata: o do Club de Remo Vilaxoán, a masculina, e o do C.R. Mecos, a feminina.
A temporada do banco fixo dará o salto este mércores, 1 de maio, ás traiñeiriñas, no caso da Territorial Sur, coa novena Bandeira Concello de Vigo.